Swaartekrag
Songs en lirieke deur Danie du Toit
Musiek deur Spoegwolf
Kletsrym deur Albert van der Merwe
1. Inleiding
hey, staan stil vir een sekonde
mamma, kyk na my wonde
dis nie wonde nie, my kind
jy mag dalk net so dink
maar baie meer het al baie meer verloor
as ek haar meer kon mis het ek gedisintegreer
2. Wals
Kathryn, wil jy wals
my hart het al hel toe gegaan
en my vriende’s die waters in
om die stukkies op planke te haal
jy maak my een sekonde oud
die grasse is al lank
die band wat hier êrens wegkruip
speel van Jesus en hardehout
tussendeur stukkies van jou
jy maak my een sekonde oud
maar staan my digter by
hoe alleen wil jy eintlik wees?
maak jou hande vas aan my
want, ai,
jy is die gryp wat my nog stadig kry
nee, ek weet nie waarheen my bloedklonte loop nie
maar jy’t êrens hier in my kom sit
3. Loerie
daar is ’n loerie in die boom
en ’n meisie in die stroom
ja, die middag het haar blond gemaak
daar is ’n bottel in my hand en ’n bier in my hart
ja, die middag het my swaar gemaak
kan ek jou kom sien?
ek dink ek ly my lewe lank aan swaartekrag
daar is ’n dier in jou kyk wat ’n skaduwee kan eet
en die ruite van my skedel steel
so bleik jou lig my brein
met jou lyfie ge-stain
watermerke in my keel
kan ek jou kom sien?
ek dink ek ly my lewe lank aan swaartekrag
ek gaan jou kom sien
ek weet jy ly ook jou lewe lank aan swaart
daar is ’n spook in die poel
wat by die stroom af spoel
ek word die monster van die see
ek gooi my boot op die rots
in my haat en my trots
waterdeinings van jou hartseer
kan maar vir my kom sien
verdrink en ly ons lewens lank aan swaartekrag
liewe here, sien
ons almal ly ons lewens lank aan swaartekrag
liewe here, sien
ons almal ly ons lewens lank aan swaartekrag
4. Somerset-Wes
hulle sê die son gaan skyn daar op Somerset-Wes
vat my net
lief, hoor jy hoe die honde blaf in die dood van die nag
die dood van die nag
wel, ek weet jy wonder wat jou pa gaan sê
glo my net
vir jou skryf ek jou naam op die bors van die Here God
die Here God
ek het gisteraand weer gewonder of ek vir jou maar kan bel
ek het jou nommer in jou kop en in my mond afgetel
5. Lenie Blou
ek het gisteraand weer gewonder of ek vir jou maar kan bel
ek het jou nommer in jou kop en in my mond afgetel
daar was ’n spook op my bed, sy wou my kaal uittrek
en by vriende brag en sê “hy’s by my”
nee, dit was vieruur die oggend toe ek jou bene sien
met daai goue lint wat om jou enkel bind
jy sê “Danie, jy sal my ook maar vir noit weer kan sien
jy’t te veel geroep en te veel gedink
maak dit by verby by met my”
maar Lenie, ek sweer dat as die oggend kom
sal ek steeds hier staan, soos jou clown vermom
en jou pa kan skree
jou moed kan breek
daar’s altyd moed wat in my steek
hey-hey-hey, my Lenie Blou
hierdie bos brand net vir jou
hey, my Lenie Blou
my Lenie Blou
met jou donkerblou sukkel ek om asem te haal
en die klip in die lug lyk vir my te kaal
ek’t jou gesê selfs die engele sal my nooit kan keer nie
ek het een keer verloor
en nooit, nooit weer nie, nee
jy’s vir my die lig in my
ja, jy’s vir my die lig in my
maar Lenie, ek sweer dat as die oggend kom
sal ek steeds hier staan, soos jou clown vermom
en jou pa kan skree
jou moed kan breek
daar’s altyd moed wat in my steek
hey-hey-hey, my Lenie Blou
hierdie bos brand net vir jou
hey, my Lenie Blou
my Lenie Blou
6. Neurie
[Instrumental]
7. Kathryn
onder in die dam lê ek opgegaar
swaar en koud en altyd naby aan jou
hoor jy die druppeltjies weergalm?
die lig drup op my arm
maak my van binne af weer warm
op die rand van die tafel
ek dans en kyk oor die wêreld uit
ek breek ’gat in die venster
ek sê vanaand kom ek lewend hier uit
hel, jy weet ek moet bly, Kathryn
Kathryn, Kathryn, Kathryn, Kathryn
en ek sê o, Kathryn
ek staan nou tien voet op in die lug
die engele om my huil, Kathryn
ek staan nou tien voety op in die lug
die engele om my huil
sy deel ’n kamer met haar twee suster
sy maak vandag vaag vir my soos ’n gister
hoor jy die druppeltjies weergalm?
die lig drup op my arms
maak my van binne af weer warm
Kathryn, Kathryn, Kathryn, Kathryn
en ek sê o, Kathryn
ek staan nou tien voet op in die lug
die engele om my huil, Kathryn
ek staan nou tien voety op in die lug
die engele om my huil
8. Kort Dônner
wat’s daai lyne op jou gesig?
nee, dis seker net die lig
trek jou lip styf teen my verlede
al my stories is net oordrewe
en dalk oorlede
wie’s daai kort dônner op die corner
waarmee jy heeldag staan en praat?
hy moet sy eie vriende maak
ek was al meer as net een keer jonk gewees
en die hemel alleen, dié weet
ek is al amper dood van gees
aangetrek soos ’n blinkertjie
jy gooi my hart soos ’n sinkertjie
net een woord, elk ’asem lank
as jy so slaap en praat maak jy my net só bang
wie’s daai kort dônner op die corner
waarmee jy heeldag staan en praat?
hy moet sy eie vriende maak
ek was al meer as net een keer jonk gewees
en die hemel alleen, dié weet
ek is al amper dood van gees
9. Sambreëltjie
wel, hierdie soutpillaar het nou met ’n moerse knal gebreek
ek wonder wanneer jy van jou sal laat weet
hierdie kamer sluk my in, hierdie kussing sluk my weg
maar jy bly op my oë soos ’n sonvlek
ai, sambreëltjie, hou jouself net bo
die ergste lê daar voor
op die agterstoep van my brein raak ek dronk aan iets soos jy
jou voete skuif nader, kruisbeen-hooggety
ek het ’n foto, maar dis klein
van iets wat lyk soos jy
ag, hou dit toe, die sal my kamer aan die brand slaan
ek dink jou bloed is in my hart
jou God in my long
ek styg in ’n sprong
soos ’n warmballon
10. Kogelbaai
staan ’n bietjie stil
teken daai boompie klaar op my hand
ek versamel jou
in koeldrankbottels vol warmgemaakde sand
warmgemaakde goud
ek het my verloor
trek daai truitjie uit, jy martel my
kyk wat hou ons oor
almal sê die man in my is dood
maar daar’s iets in my bloedstroom
wel, dis heeltemal te laat
om van plan te verander
sit net langer, sit net langer
11. Drietyd Op Die Dakke
red my dan
ek sal selfs my siel verkoop
vir ’n kamer langsaan jou
dan klim ons uit
en klim tot op die dak
waar die stad vir jou kan kyk
vir jou sal ek dan al my tyd verruil
ek het dan amper die Here gevang in jou hand
Kathryn, jy
gryp my nou
en dan hou ons onstwee blind
wees jy die laaste ding in my sig
al loop ons tien keer om dieselfde blok
tot die mense saam ons sing
ons hoef dan nooit meer te praat nie
Kathryn, jy
groen kindjie
12. Syn
gaan woon ons in ’n boomhuis alleen
en as dit reën sal ek op die dak gaan staan
en elke druppel vang vir ons
in ’n blou keteltjie, vrou
weet jy nie?
ons kan deur hierdie kom
selfs met ’n hartseer glimlag
dan nooi ons al ons vriende om te trou
ek dink ek het een of twee
maar die vloer is lendelam
hierdie mense maak my eintlik net bang
hey, staan stil vir een sekonde
mamma, kyk na my wonde
dis nie wonde nie, my kind
jy mag dalk net so dink
maar baie meer het al baie meer verloor
as ek haar meer kon mis het ek gedisintegreer
jy weet ek kan dalk arm bly
ek sit vas in verledetyd
maar jy bly my by
jy sleep my langsaan tot jou slaap
met my hart tot op jou oor
ek weet hy’s dood, maar hy praat met my
en daar’s krake op die vensters van my oë
wat de fok? is dit jy wat daar skuil
in die koelte van my syn
hey, staan stil vir een sekonde
mamma, kyk na my wonde
dis nie wonde nie, my kind
jy mag dalk net so dink
maar baie meer het al baie meer verloor
as ek haar meer kon mis het ek gedisintegreer
13 .Wals ii
Kathryn, wil jy wals?
almal het om jou verdwyn
en die klop in jou bors weergalm
oor die kranse van my brein
gee my een verdomde kans
om ons nog saam hier uit te kry
hou jou hande op
die skemer steek jou nog weg
draai jou lyfie om
die aarde sal om jou breek
die einde kan maar kom
Here, ek voel ’n veer
draai jou lyfie om
die aarde sal om jou breek
die einde kan maar kom
Here, ek voel ’n veer
jy staan die winde teen
Ek sien jou op die golwe
my ding
ek sien iets wat in my blink
